ମାହାଙ୍ଗା / ଦେବେନ୍ଦ୍ର ଷଡ଼ଙ୍ଗୀ: ମାହାଙ୍ଗା ଥାନା ଅନ୍ତର୍ଗତ ସାଲେପୁର-ଛତିଆ ପୁର୍ତରାସ୍ତାର କୋଠପଦା ଛକ ନିକଟରେ ଏକ ସଡକ ଦୁର୍ଘଟଣାରେ ସ୍ଥାନୀୟ କାଳିଅଂଟି ଗ୍ରାମର ନୃସିଂହ ଚରଣ ବାରିକଙ୍କ ପୁତ୍ର ସତ୍ୟଜିତ (୨୫)ଙ୍କ ମୃତ୍ୟୁ ହୋଇଛି । ସୂଚନାରୁ ଜଣାଯାଇଛି ଯେ ସତ୍ୟଜିତ ଏକ ପଲସର ବାଇକରେ ବସି କଟକରୁ ନିଜ ଘରକୁ ଏହି ରାସ୍ତାଦେଇ ଫେରୁଥିବା ବେଳେ କୋଠପଦା ବ୍ୟାଙ୍କ ଛକ ଠାରେ ଏକ ହାଇୱା ଟ୍ରକ ନଂ (ଓଡି୦୫ଡବ୍ଲ୍ୟୁ ୫୮୧୫ ) ପଛପଟୁ ଧକ୍କା ଦେବା ଫଳରେ ବାଇକ ପଛପଟରେ ବସିଥିବା ସତ୍ୟଜିତ ଛିଟିକି ପଡିଥିଲେ । ପରେ ହାଇୱା ଗାଡି ପଛ ଚକା ସତ୍ୟଜିତଙ୍କ ମୁଣ୍ଡ ଉପରେ ଚଢି ଯିବା ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିବା ଜଣାଯାଇଛି । ମୃତ ସତ୍ୟଜିତଙ୍କୁ ୧୦୮ ଆମ୍ବୁଲାନ୍ସରେ ମାହାଙ୍ଗା ମେଡିକାଲକୁ ନିଆଯାଇଥିବାବେଳେ ଡାକ୍ତର ମୃତ ଘୋଷଣା କରିଥିଲେ । ଖବର ପାଇ ମାହାଙ୍ଗା ପୋଲିସ ଦୁର୍ଘଟଣାସ୍ଥଳରେ ପହଂଚି ଦୁର୍ଘଟଣାଗ୍ରସ୍ତ ଗାଡି ଦୁଇଟିକୁ ଜବତ କରି ଏକ ଅପମୃତ ମାମଲା ରୁଜୁ କରିବା ସହ ଶବ ଜବତ କରିଥିବା ଜଣାଯାଇଛି ।