ଉମରକୋଟ/ ଜିତେନ୍ଦ୍ର ମହାନ୍ତି: ଜମିଜମା ବିବାଦକୁ ନେଇ ସଂଘଟିତ ହୋଇଛି ହତ୍ୟାକାଣ୍ଡ । ପୁତୁରାର ଟାଙ୍ଗିଆ ଓ ଛୁରୀ ଚୋଟରେ ବଡ଼ ବାପା ମୃତ୍ୟୁବରଣ କରିଥିବା ବେଳେ ଭାଇ ଗୁରୁତର ହୋଇଛନ୍ତି । ଏଭଳି ଏକ ଅଭାବନୀୟ ଘଟଣା ଘଟିଛି ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ୍ ଅନ୍ତର୍ଗତ ବୁର୍ଜା ଗ୍ରାମରେ ।
ପ୍ରାପ୍ତ ସୂଚନା ମୁତାବକ୍ ବୁର୍ଜା ଗ୍ରାମର ବାଘପାରା ସାହିରେ ରହୁଥିବା ଖାଡି ଗଣ୍ଡ ଓ ତାଙ୍କ ସାନ ଭାଇଙ୍କ ମଧ୍ୟରେ ପୂର୍ବରୁ ଜମିଜମା ବିବାଦ ଲାଗି ରହିଥିଲା । ଆଜି ରାତ୍ର ପ୍ରାୟ ୮ ଟା ସମୟରେ ଖାଡି ଗଣ୍ଡ ନିଜ ପରିବାର ସହ ଘରେ ରହିଥିବା ସମୟରେ ତାଙ୍କ ସାନ ଭାଇଙ୍କ ଦୁଇ ପୁଅ ହଠାତ୍ ଘର ମଧ୍ୟକୁ ପଶି ଆସି ଟଙ୍ଗିଆ ଓ ଏକ ଛୁରୀରେ ଆକ୍ରମଣ କରିଥିବା ଅଭିଯୋଗ ହୋଇଛି । ନିଜ ପୁତୁରାର ଟାଙ୍ଗିଆ ଚୋଟରେ ଖାଡି ଗଣ୍ଡଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବାବେଳେ ତାଙ୍କ ପୁଅ ରବିନ୍ଦ୍ର ଗଣ୍ଡଙ୍କ ବାମ କାନ୍ଧ ଓ ଛାତିରେ ଆଘାତ ଲାଗିବାରୁ ଗୁରୁତର ଅବସ୍ଥାରେ ପ୍ରଥମେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଏବଂ ପରେ ସଂକଟାପନ୍ନ ଅବସ୍ଥାରେ ଅଧିକ ଚିକିତ୍ସା ପାଇଁ କୋରାପୁଟ ମେଡିକାଲ କଲେଜକୁ ସ୍ଥାନାନ୍ତର କରିଥିବା ଡାକ୍ତର ପ୍ରକାଶ କରିଛନ୍ତି । ସେପଟେ ଘଟଣାର ଖବର ପାଇ ଉମରକୋଟ ଥାନା ଅଧିକାରୀ ନରେଶ କୁମାର ପ୍ରଧାନ ଉକ୍ତ ଗ୍ରାମକୁ ଯାଇ ତଦନ୍ତ ଆରମ୍ଭ କରିଥିବା ଜଣାପଡିଛି ।