ରାଉରକେଲା (ବସନ୍ତ କୁମାର ଜେନା): ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ସହରରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଅସାବଧାନତା ଯୋଗୁଁ ଜଣଙ୍କ ଘରେ ନିଆଁ ଲାଗିଥିବାବେଳେ ପରିବାରର ଜଣେ ଗୁରୁତର ଆହତ ହୋଇଛନ୍ତି । ସୂଚନାନୁଯାୟୀ, ରାଜଗାଙ୍ଗପୁର ପୌରପାଳିକା ଅଧିନସ୍ଥ ୱାର୍ଡ଼ ନଂ-୭ ଗୋଶାଳା ନିବାସୀ ସରୋଜ ସାହୁଙ୍କ ଘରେ ଆଜି ନିଆଁ ଲାଗିଯାଇଥିଲା । ଆଜି ମାର୍ଗଶୀର ମାସ ଶେଷ ଗୁରୁବାର ଥିବା ଯୋଗୁଁ ଘରେ ଦ୍ୱୀପ ଲାଗିଥିବା ଯୋଗୁଁ କୌଣସି କାରଣ ବଶତଃ ଦ୍ୱୀପରୁ ନିଆଁ ଘରେ ଲାଗିଥିଲା । ଫଳରେ ଘର କାନ୍ଥରେ ଲାଗିଥିବା ପରଦାରେ ନିଆଁ ଲାଗିଥିଲା । ଘରେ ସରୋଜ ସାହୁଙ୍କ ପତ୍ନୀ ପରମିତା ସାହୁ ଏହି ନିଆଁରେ ଗୁରୁତର ଆହତ ହୋଇଥିଲେ । ଦୁର୍ଭାଗ୍ୟର ବିଷୟ ଏହି କି,ଖବର ପାଇ ଅଗ୍ନିଶମ ବିଭାଗ ଆସୁଥିବାବେଳେ ରେଳ ଫାଟକ ବନ୍ଦ ଥିବା ଯୋଗୁଁ ଫାଟକ ଠାରେ ଫଶିଯାଇଥିଲା । ଯଥାଶୀଘ୍ର ଲୋକଙ୍କ ସହାୟତାରେ ସରୋଜ ସାହୁଙ୍କ ପତ୍ନୀଙ୍କୁ ଉଦ୍ଧାର କରାଯାଇଥିଲା । ଘଟଣାସ୍ଥଳରେ ଅଗ୍ନିଶମ ବିଭାଗର ପହଚିଂବା ପରେ ନିଆଁକୁ ଆୟତ କରାଯାଇଥିଲା । ଗୁରୁତର ପରମିତା ସାହୁଙ୍କୁ ରାଜଗାଙ୍ଗପୁର ସରକାରୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ନିଆଯାଇଥିବାବେଳେ ସେଠାରେ ତାଙ୍କ ଅବସ୍ଥା ଗୁରୁତର ଥିବାରୁ ରାଉରକେଲା ସ୍ଥାନାନ୍ତର କରାଯାଇଥିବା ଜଣାପଡ଼ିଛି । ଏହି ନିଆଁରେ ଘରର ସାମଗ୍ରୀ ଜଳି ଯାଇଛି ।