୧ଶହ ଛେଳି ମୃତ, ଗୋଠ ମାଲିକଙ୍କ କ୍ଷତିପୂରଣ ଦାବି
ଓଡ଼ଗାଁ, (ଶ୍ରୀକାନ୍ତ କୁମାର ମିଶ୍ର ) : ଓଡ଼ଗାଁ ଥାନା ଓଡ଼ଗାଁ-ବାହାଡ଼ାଝୋଲା ରାସ୍ତା ବାହାଡ଼ାପିଠା ଓ ମଶାବାରୀ ମଧ୍ୟରେ ଏକ ଛେଳିଗୋଠ ଉପରେ ବାଲିବୋଝେଇ ହାଇଓ୍ବା ମାଡ଼ି ଯିବାରୁ ପ୍ରାୟ ୧ ଶହ ଛେଳିଙ୍କର ମୃତ୍ୟୁ ହୋଇଯାଇଛି । ମଙ୍ଗଳବାର ମଧ୍ୟରାତ୍ରରେ ଗୈାଡପୁଟ ପଞ୍ଚାୟତ ଚମ୍ପାପାଣ୍ଡେରୀ ନିକଟ ଗୋଲାସାହିର ସୁବାସ ପାତ୍ର(୬୦), ପୁଅ ରାଜେନ୍ଦ୍ର ପାତ୍ର ଓ ଗୋଜାଙ୍କ ସହାୟତାରେ ଦୁତୀକେଶ୍ବର ମନ୍ଦିର ଠାରେ ବିଶ୍ରାମ ନେଉଥିବା ଛେଳି ଗୋଠ ଧରି ନିଜ ଗାଁ ଗୋଲାସାହିକୁ ଫେରୁଥିଲେ । ଦିନର ଗହଳି ପୂର୍ବରୁ ଗାଁକୁ ଫେରିଯିବା ପାଇଁ ରାତି ପ୍ରାୟ ୧୨ ସମୟରେ ବାହାରି ଓଡ଼ଗାଁ ଅଭିମୁଖେ ଆସୁଥିବା ସମୟରେ ବାହାଡ଼ାପିଠା-ମଶାବାରୀ ମଧ୍ୟରେ ଥିବା ଲେଦ ନିକଟରେ ସାମ୍ନା ପାଖରୁ ଆସୁଥିବା ଓଡି ୨୫ ଜି ୭୨୯୨ ବାଲି ବୋଝେଇ ହାଇଓ୍ବା ସିଧା ସଳଖ ଗୋଠ ଉପରେ ମାଡିଯାଇଥିଲା । ଫଳରେ ଗୋଠର ଅର୍ଦ୍ଧାଧିକ ଛେଳିଙ୍କର ମୃତ୍ୟୁ ହୋଇଥିଲା । ଛେଳି ମରିବା ସହିତ ଅନେକ ଆହତ ଛେଳି ଅନ୍ଧାରିଆ ରାସ୍ତାରେ ଏଣେତେଣେ ଚାଲିଯାଇଥିବାରୁ ଏହା ସୁଯୋଗରେ ସ୍ଥାନୀୟ କିଛି ବିଶୃଙ୍ଖଳିତ ବ୍ୟକ୍ତି କିଛି ଛେଳି ଟେକି ନେଇଥିବା ଗୋଠ ମାଲିକ ଅଭିଯୋଗ କରିଥିଲେ । ଘଟଣାଟି ମଙ୍ଗଳବାର ମଧ୍ୟରାତ୍ରରେ ଘଟିଯାଇଥିବା ବେଳେ ଓଡ଼ଗାଁ ପୋଲିସ ଭୋର ୫ ସମୟରେ ଘଟଣାସ୍ଥଳରେ ପହଁଚି ତଦନ୍ତ ଆରମ୍ଭ କରୀଛନ୍ତି ।
