ପୁରୀ:ପ୍ରଥମେ ଗରିବ ଫଳ ବ୍ୟବସାୟୀଙ୍କୁ ମାଡ ମାରିଲେ, ପରେ କର୍ତ୍ତବ୍ୟରତ ସାମ୍ବାଦିକକୁ ବୁଟ ମାଡ । ଏଭଳି ଘଟଣା ଘଟିଛି ପୁରୀ ବଡଶଙ୍ଖ ବଜାରରେ । ସୀମା ଟପିଛି ପୋଲିସ ।
ସୂଚନା ଅନୁସାରେ, ପୂର୍ବାହ୍ନରେ ଦୋକାନ ପକାଇବାକୁ ନେଇ ହାତାହାତି ହୋଇଥିଲେ ବ୍ୟବସାୟୀ ଓ ପୋଲିସ । ପରିସ୍ଥିତି ଏପରି ହୋଇଥିଲା କି ଲାଠି ମାଡରେ ଲହୁ ଲୁହାଣ ହୋଇଥିଲେ ଫଳ ଦୋକାନୀ ଦୀପକ ସାହୁ । ଘଟଣା ସ୍ଥଳରେ ଖବର ସଂଗ୍ରହ କରୁଥିବା ଧରିତ୍ରୀର ଜିଲ୍ଲା ପ୍ରତିନିଧି ଦତ୍ତତ୍ରୟ ନାୟକଙ୍କୁ ମଧ୍ୟ ମାଡ ମରାଯାଇଥିଲା । ପୋଲିସ ଅଧିକାରୀଙ୍କ ଠାରୁ ଘଟଣା ବିଷୟରେ ପଚାରୁଥିଲି । ଠିକ ଏହି ସମୟରେ ୬/୭ ପୋଲିସ ଏକାଠି ଶ୍ରୀ ନାୟକଙ୍କୁ ତଳେ ପକାଇ ବୁଟରେ ମାଡ ଦେବା ସହ ଭିଡି ଭିଡି ଭ୍ୟାନରେ ବସାଇଥିଲେ । ପରିଚୟ ଦେଇଥିଲେ ମଧ୍ଯ ଶୁଣି ନଥିଲା ପୋଲିସ ବୋଲି ଅଭିଯୋଗ କରିଛନ୍ତି ସାମ୍ବାଦିକ ଶ୍ରୀ ନାୟକ ।
ଏନେଇ ବଡଶଙ୍ଖ ଠାରେ ସାମ୍ବାଦିକ ଶ୍ରୀ ନାୟକ ଧାରଣାରେ ବସିଥିଲେ । ଖୋଦ କୁମ୍ଭାରପଡା ଥାନା ଅଧିକାରୀ ବିଚିତ୍ରା ନନ୍ଦ ସେଠୀ ଓ ସିଟି ଡିଏସପି ଘଟଣାସ୍ଥଳରେ ଉପସ୍ଥିତ ଥାଇ ମଧ୍ୟ ଘଟଣାକୁ ଉପଭୋଗ କରୁଥିଲେ ବୋଲି କହିଛନ୍ତି ସାମ୍ବାଦିକ ଶ୍ରୀ ନାୟକ। ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ପୋଲିସର ଏଭଳି କାର୍ଯ୍ୟକଳାପକୁ ସାଧାରଣରେ ନିନ୍ଦା କରାଯାଇଛି ।
