ଝାରସୁଗୁଡ଼ା :(ସୁଭାଷ ସହାରେ) -ଝାରସୁଗୁଡ଼ା ଟାଉନ ଥାନା ଅନ୍ତର୍ଗତ ଦୁର୍ଲଗା ଗ୍ରାମ ରାସ୍ତାକଡ଼ରୁ ଜଣେ ମୃତ ବ୍ୟକ୍ତିଙ୍କ ଦେହ ଠାବ କରିଛି ପୋଲିସ। ମୃତଦେହକୁ ଦେଖି ହତ୍ୟା କରାଯାଇଥିବା ସନ୍ଦେହ କରାଯାଉଛି। ମୃତବ୍ୟକ୍ତି ଜଣକ ଦୁର୍ଲଗା ଗ୍ରାମର ଇନ୍ଦ୍ରମଣି ସାହୁ ଓ ତାଙ୍କର ବୟସ ୪୨ ବର୍ଷ ବୋଲି ଜଣାପଡ଼ିଛି।
ସୂତ୍ର ଅନୁଯାୟୀ, ଇନ୍ଦ୍ରମଣିଙ୍କ ତାଙ୍କ ପରିବାରର ସଦସ୍ୟଙ୍କ ସହ ମନୋମାଳିନ୍ୟ ଥିଲା। ଏନେଇ ପରିବାରର ଲୋକେ ଏକ ଅଭିଯୋଗ ମଧ୍ୟ କରିବାକୁ ଯାଇଥିଲେ । ଏହାପରେ ସେମାନଙ୍କ ମଧ୍ୟରେ ଫାଣ୍ଡି ବାହାରେ ଏକ ବୁଝାମଣା ହୋଇଥିଲା ଓ ସମସ୍ତେ ଘରକୁ ଫେରିଯାଇଥିଲେ। ଘରକୁ ଫେରିବା ପରେ ଇନ୍ଦ୍ରମଣି ପୁନର୍ବାର ପରିବାରର ସଦସ୍ୟଙ୍କ ସହ ଝଗଡ଼ା କରି ଘରୁ ଚାଲିଯାଇଥିଲେ। ପରେ କିଛି ସ୍ଥାନୀୟ ଲୋକେ ତାଙ୍କର ମୃତଦେହ ଦେଖିବାକୁ ପାଇଥିଲେ ଏବଂ ପୋଲିସକୁ ଏ ସଂକ୍ରାନ୍ତରେ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳକୁ ପହଞ୍ଚି ମୃତଦେହକୁ ଜବତ କରି ଶବ ବ୍ୟବଚ୍ଛେଦ ପାଇଁ ପଠାଇ ଦେଇଥିଲେ।
ପୋଲିସ ଏକ ଅପମୃତ୍ୟୁ ମାମଲା (12/21) ରୁଜୁ କରି ଘଟଣାର ତଦନ୍ତ କରୁଛନ୍ତି। ଯଦିବା ଏହାକୁ ହତ୍ୟା ବୋଲି ସନ୍ଦେହ କରାଯାଉଛି, ମୃତ୍ୟୁର ଅସଲ କାରଣ ପାଇଁ ତଦନ୍ତ ଜାରି ରହିଥିବା ପୋଲିସ ସୂତ୍ରରୁ ଖବର ମିଳିଛି।
