ଝାରସୁଗୁଡ଼ା :(ସୁଭାଷ ସହାରେ) -ଝାରସୁଗୁଡ଼ା ଜିଲ୍ଲାର ଭୁର୍କାମୁଣ୍ଡା ଓ କୁରେବଗା ମଝିରେ ଥିବା ରିଜର୍ଭ ଫରେଷ୍ଟରେ ଆଜି ବ୍ୟାପକ ଅଗ୍ନିକାଣ୍ଡ ଘଟିଥିବାର ଖବର ମିଳିଛି। ସୂଚନା ଅନୁସାରେ, ଏହି ନିଆଁ ନିକଟସ୍ଥ ବେଦାନ୍ତ କମ୍ପାନୀ ଅଞ୍ଚଳକୁ ମଧ୍ୟ ବ୍ୟାପି ଯାଇଥିଲା। ଫଳରେ ବେଦାନ୍ତ ଅଞ୍ଚଳର ଶୁଖିଲା ଘାସ ଓ ବୁଦା ଜଳିବା ସହିତ ପରିସରରେ ଥିବା କିଛି ସାମଗ୍ରୀ ମଧ୍ୟ ନିଆଁର ପ୍ରକୋପ ଦ୍ବାରା ପ୍ରଭାବିତ ହୋଇଥିଲେ। ବନ ବିଭାଗ କର୍ମଚାରୀ ଓ ବେଦାନ୍ତର ଅଗ୍ନିଶମ ବିଭାଗ ଅନେକ ପରିଶ୍ରମ ପରେ ନିଆଁକୁ ନିୟନ୍ତ୍ରଣ କରି ପାରିଥିଲେ।
ଅନ୍ୟ ପକ୍ଷରେ ଝାରସୁଗୁଡ଼ା ଜିଲ୍ଲାପାଳ ଆଜି ନିଜର ଏକ ଟ୍ବିଟ୍ ମାଧ୍ୟମରେ ଜଙ୍ଗଲ ବିଭାଗ ଓ ପଞ୍ଚାୟତସ୍ତରର ପ୍ରତିନିଧିମାନଙ୍କ ପ୍ରୟାସକୁ ପ୍ରଶଂସା କରିଛନ୍ତି। ଡିଏଫଓଙ୍କ ଉପସ୍ଥିତିରେ ଜଙ୍ଗଲକୁ ନିଆଁ ଦାଉରୁ ରକ୍ଷା କରିବା ପାଇଁ ସଚେତନତା ସୃଷ୍ଟି କରିବା ପାଇଁ ପିଆରଆଇମାନଙ୍କୁ ପ୍ରଶଂସା କରିଛନ୍ତି ଜିଲ୍ଲାପାଳ।
