ଶୋକ ବ୍ୟକ୍ତ କଲେ ରାଜ୍ୟ ଛାତ୍ର ବିଜେଡି ସଭାପତି ଦେବୀରଂଜନ
ରାୟଗଡାରୁ ସରୋଜ ସାହୁ : ଏକ ମର୍ମନ୍ତୁଦ ସଡକ ଦୁର୍ଘଟଣାରେ ଅକାଳରେ ମୃତ୍ୟୁବରଣ କରିଛନ୍ତି ଛାତ୍ର ବିଜେଡିର ଗୁଣୁପୁର ନଗର ସଭାପତି ସନାତନ ପାଣି(୨୪) | ଗତ ରବିବାର ସେ ବାଇକରେ ଯାଉଥିବାବେଳେ ଗୁଣପୁର ଏସବିଆଇ ମୁଖ୍ୟଶାଖା ନିକଟରେ ତାଙ୍କର ଦୁର୍ଘଟଣା ହୋଇଥିଲା। ତାଙ୍କର ଆପାତକାଳୀନ ଚିକିତ୍ସାପରେ ବିଶାଖାପାଟଣାରେ ଏକ ଘରୋଇ ମେଡିକାଲରେ ରବିବାର ରାତିରେ ଭର୍ତ୍ତି କରାଯାଇଥିଲା। ହେଲେ ମଙ୍ଗଳବାର ରାତିରେ ଚିକିତ୍ସାଧୀନ ଅବସ୍ଥାରେ ସନାତନଙ୍କ ଦେହାନ୍ତ ହୋଇଛି । ଆଜି ସକାଳେ ସନାତନଙ୍କ ମୃତଶରୀର ନିଜ ଘର ବେବର୍ତ୍ତାଢେପ ସାହିରେ ପହଞ୍ଚିବା ବେଳକୁ ସେଠାରେ ଶହ ଶହ ସମର୍ଥକ, ସାଙ୍ଗସାଥି ଓ ପରିବାରବର୍ଗ ଶେଷଦର୍ଶନ ପାଇଁ ଅପେକ୍ଷା କରି ରହିଥିଲେ । ବିଜେଡିର ଛାତ୍ର ସଂଗଠନର ଜଣେ ଟାଣୁଆ ତଥା ଦକ୍ଷ ସଂଗଠକ ଭାବେ ଜଣାଶୁଣା ସନାତନ ଅତ୍ୟନ୍ତ ମେଳାପୀ, ପରୋପକାରୀ, ବନ୍ଧୁବତ୍ସଳ ଭାବେ ସମସ୍ତଙ୍କ ପାଖରେ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିଲେ | ତାଙ୍କ ବିୟୋଗରେ ଗୁଣୁପୁର ସହରରେ ଶୋକର ଛାୟା ଖେଳିଯାଇଛି | ଆଜି ହଜାର ହଜାର ଲୋକଙ୍କ ଉପସ୍ଥିତିରେ ତଥା ଶୋକାକୂଳ ପରିବେଶ ମଧ୍ୟରେ ସ୍ଥାନୀୟ ବଂଶଧାରା ନଦୀତଟ୍ଟରେ ସନାତନଙ୍କ ଅନ୍ତିମ ସଂସ୍କାର ସମ୍ପନ୍ନ ହୋଇଛି |
ସନାତନଙ୍କ ଅକାଳ ବିୟୋଗରେ ଗଭୀର ଶୋକଵ୍ୟକ୍ତ କରିଛନ୍ତି ବିଜୁ ଛାତ୍ର ଜନତା ଦଳର ରାଜ୍ୟ ସଭାପତି ତଥା ବିଧାୟକ ଦେବୀରଂଜନ ତ୍ରିପାଠୀ | ଶ୍ରୀ ତ୍ରିପାଠୀ ତାଙ୍କ ଶୋକବାର୍ତ୍ତାରେ କହିଛନ୍ତି ସାଥି ସନାତନଙ୍କ ବିୟୋଗ ଆମ ଦଳ ପାଇଁ ଖାସ କରି ଛାତ୍ର ସଂଗଠନ ପାଇଁ ଏକ ଅପୂରଣୀୟ କ୍ଷତି | ସନାତନଙ୍କ ବିୟୋଗ ଅବିଶ୍ୱସନୀୟ ଓ ଅତ୍ୟନ୍ତ ଦୁଃଖଦ | ଜଣେ ଦକ୍ଷ ସଂଗଠକ ଭାବେ ସେ ସଙ୍ଗଠନକୁ ମଜଭୁତ କରିବା ପାଇଁ ନିଷ୍ଠାପର ଭାବେ ନିରବଛିନ୍ନ ପ୍ରୟାସ କରି ଆସୁଥିଲେ | ରାୟଗଡା ଜିଲ୍ଲା ଛାତ୍ର ସଙ୍ଗଠନରେ ସର୍ବୋପରି ଦଳ ଭିତରେ ତାଙ୍କ ଭଳି ଉତ୍ସର୍ଗୀତ, ଦୃଢ ତଥା ଆମାୟିକ ଛାତ୍ରନେତାଙ୍କ ଶୁନ୍ୟତା ସର୍ବଦା ଅନୁଭୂତ ହେବ | ମୁଁ ତାଙ୍କ ଅମରାତ୍ମାର ସଦ୍ଗତି କାମନା କରିବା ସହ ଶୋକ ସନ୍ତପ୍ତ ପରିବାର ବର୍ଗଙ୍କୁ ଗଭୀର ସମବେଦନା ଜ୍ଞାପନ କରୁଛି " ବୋଲି କହିଛନ୍ତି ଛାତ୍ର ବିଜେଡି ରାଜ୍ୟ ସଭାପତି ଶ୍ରୀ ତ୍ରିପାଠୀ |
