ବୀରମହାରାଜପୁର - (ଉପଖଣ୍ଡ ପ୍ରତିନିଧି ବିନୋଦ ପାଣ୍ଡେ ) : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକର ଖଣ୍ଡହତା ପଞ୍ଚାୟତ ଅନ୍ତର୍ଗତ ବୁଠିପଦର ଗ୍ରାମରେ କୌଣସି କାରଣରୁ ଦୁଇଟି ପରିବାରର ୪ ବଖରା ଘର ସମ୍ପୂର୍ଣ୍ଣ ଜଳି ପାଉଁଶ ହୋଇଯାଇଛି । ଗ୍ରାମର ଶ୍ୟାମସୁନ୍ଦର ପଧାନ ଓ ଦୁର୍ଯ୍ୟୋଧନ ପଧାନଙ୍କ ଘର ନିଆଁ ଲାଗି  ସଂପୂର୍ଣ୍ଣ ପାଉଁଶ ହୋଇଯାଇଛି । ଖବର ପାଇ ବୀରମହାରାଜପୁର ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିବା ବେଳେ  ସେତେବେଳେକୁ ୪ ବଖରା ସହ ପ୍ରାୟ ଅଧିକାଂଶ ଧାନ ବସ୍ତା, ଚାଉଲ ବସ୍ତା, ଲୁଗାପଟା, ବିଭିନ୍ନ ପ୍ରମାଣ ପତ୍ର ଓ ଘର କରଣ ସାମଗ୍ରୀ ସଂମ୍ପୂର୍ଣ୍ଣ ପୋଡି ପାଉଁଶ ହୋଇଯାଇଛି । ଏହି ଦୁଇ ପରିବାରକୁ ସରକାରୀ ସାହାଯ୍ଯ ଯୋଗାଇଦେବାକୁ ଗ୍ରାମବାସୀ ଦାବି କରିଛନ୍ତି ।