ଝାରସୁଗୁଡ଼ା :(ସୁଭାଷ ସହାରେ)/ ଝାରସୁଗୁଡା ଜିଲ୍ଲା ବନ୍ଧବାହାଲ ଫାଣ୍ଡି ଅନ୍ତର୍ଗତ କିରାରମା ଗାଁ ପୋଖରୀରେ ଗତ ବୁଧବାର ରାତିରେ ଗାଧୋଉଥିବା ବେଳେ ଅସାବଧାନତା ବଶତଃ ଜଣେ ଯୁବକଙ୍କ ମୃତ୍ୟୁ ହୋଇଛି । ମୃତ୍ୟୁ ବରଣ କରିଥିବା ଯୁବକ ଜଣଙ୍କ ହେଲେ କିରାରମା ଗ୍ରାମର ଯଦୁମଣି ପ୍ରଧାନ(୨୩) ବୋଲି ଜଣାପଡିଛି । ଖବର ପାଇ ବନ୍ଧବାହାଲ ଫାଣ୍ଡି ଅଧିକାରୀ ଅଶୋକ ଦାସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଝାରସୁଗୁଡା ପଠାଇଛନ୍ତି । ଏ ନେଇ ମୃତକଙ୍କ ବଡଭାଇ ସୁରେଶ ପ୍ରଧାନ ବନ୍ଧବାହାଲ ଫାଣ୍ଡିରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗକୁ ଭିତ୍ତି କରି ପୋଲିସ୍ ବନହରପାଲି ଥାନାରେ ଏକ ଅପମୃତ୍ୟୁ ମାମଲା ( ନଂ ୨୦/୨୦) ରୁଜୁ କରି ତଦନ୍ତ ଚଳାଇଛି । ବ୍ଯବେଚ୍ଛଦ ରିପୋର୍ଟ ଆସିଲେ ଯୁବକଙ୍କ ମୃତ୍ୟୁର ପ୍ରକୃତ ଘଟଣା ଜଣାପଡିବ ବୋଲି ତଦନ୍ତକାରୀ ପୋଲିସ୍ ଅଧିକାରୀ ଦାସ ପ୍ରକାଶ କରିଛନ୍ତି । ପୋଲିସ୍ ସୂତ୍ରରୁ ପ୍ରକାଶ, ଗତ ବୁଧବାର ରାତି ୭ଟା ସମୟରେ ଯୁବକ ଜଣଙ୍କ ଗାଁ ପୋଖରୀକୁ ଏକାକୀ ଗାଧୋଇବା ପାଇଁ ଯାଇଥିଲେ । ଦୀର୍ଘ ସମୟ ହେଲା ସେ ଘରକୁ ଫେରି ନ ଥିଲେ । ଏହି ସମୟରେ ଗ୍ରାମର ସନ୍ୟାସୀ ସା ରାତି ୯ଟାରେ ପୋଖରୀକୁ ଗାଧୋଇବା ପାଇଁ ଯାଇଥିବା ବେଳେ ଯଦୁମଣିଙ୍କ ମୃତଦେହ ପୋଖରୀ ଗାଧୁଆ ତୁଠରେ ଭାସୁଥିବା ଦେଖିବାକୁ ପାଇଥିଲେ । ପରେ ସେ ଆସି ଯଦୁମଣିଙ୍କ ପରିବାରଙ୍କୁ ଜଣାଇଥିଲେ । ଖବର ପାଇ ଯୁବକଙ୍କ ପରିବାର ଲୋକେ ଗାଧୁଆ ତୁଠରେ ପହଞ୍ଚି ଯଦୁମଣିଙ୍କୁ ଉଦ୍ଧାର କରି ବେଲପାହାଡ ଟାଟା କ୍ରୋସାକୀ ହସପିଟାଲକୁ ଚିକିତ୍ସା ପାଇଁ ନେଇଥିଲେ । ସେଠାରେ ଡାକ୍ତର ଦେଖିଲା ପରେ ଯଦୁମଣିଙ୍କୁ ମୃତ ଘୋଷଣା କରିଥିଲେ । ଏଭଳି ଦୁଃଖଦ ଘଟଣା ଯୋଗୁ ଗ୍ରାମରେ ଶୋକର ଛାୟା ଖେଳିଯାଇଛି ।