ବିଜେପି ବିପୁଳ “ବିଜୟ ଲାଭ” କରିଥିବାରୁ ଓଡିଶା ବିଜେପି କାର୍ଯ୍ୟାଳୟରେ ଉତ୍ସବମୁଖର
ମୋଦି, ନଡ୍ଡା ଓ ଶାହାଙ୍କୁ ଧନ୍ୟବାଦ ଦେଲେ ରାଜ୍ୟ ସଭାପତି
ମୋଦିଜୀ ହିଁ ଭାରତକୁ ବିକାଶ ପଥରେ ଆଗେଇ ନେବେ ବୋଲି ଦେଶବାସୀ ବୁଝି ସାରିଛନ୍ତି: ମନମୋହନ
ଭୁବନେଶ୍ୱର,ତା.୦୩/୧୨: ତିନୋଟି ରାଜ୍ୟରେ ଝାଡୁ ମାରିଦେଲା ବିଜେପି |କଂଗ୍ରେସ ହାତରୁ ଛଡାଇ ଆଣିଛି ଦୁଇଟି ରାଜ୍ୟ ଛତିଶଗଡ଼ ଓ ରାଜସ୍ଥାନ | ମଧ୍ୟପ୍ରଦେଶରେ ପୁଣି ପ୍ରମାଣିତ କରିଛି ତାର ଲୋକପ୍ରିୟତା | ଦେଶର ରାଜନୀତିକୁ ପ୍ରଭାବିତ କରୁଥିବା ହିନ୍ଦୀଭାଷୀ ଅଂଚଳରେ ମଜଭୁତ କରିଛି ନିଜର ସ୍ଥିତି | ଫାଇନାଲ ମ୍ୟାଚ ପୂର୍ବରୁ ସେମିଫାଇନାଲରେ ବିପୁଳ ବିଜୟ ହାସଲ କରି ମୋଦିମାନିଆ ଆଜିବି ବଳବତ୍ତର ଅଛି ବୋଲି ସମଗ୍ର ଦେଶକୁ ଗୋଟେ ବାର୍ତ୍ତା ଦେଇଛି | ମଧ୍ୟପ୍ରଦେଶରେ ୨୩୦ ଆସନ ମଧ୍ୟରୁ ବିଜେପି ୧୬୪, କଂଗ୍ରେସ ୬୫, ଅନ୍ୟାନ୍ୟ-୧ ଆସନ ପାଇଥିବା ବେଲେ ରାଜସ୍ଥାନରେ ୧୯୯ ଆସନରୁ ବିଜେପି ୧୧୫, କଂଗ୍ରେସ ୬୯, ଅନ୍ୟାନ୍ୟ-୧୫ ଆସନ ପାଇଛନ୍ତି |
ଛତିଶଗଡରେ ୯୦ ଆସନରୁ ବିଜେପି ୫୪, କଂଗ୍ରେସ ୩୫ଟି ଆସନ ପାଇଥିବା ବେଳେ ତେଲେଙ୍ଗାନା ୧୧୯ଆସନ ମଧ୍ୟରୁ କଂଗ୍ରେସ ୬୪, ବିଆରଏସ୩୯, ବିଜେପି ୮ ଓ ଅନ୍ୟାନ୍ୟ ୮ ପାଇଛନ୍ତି | ତିନୋଟି ରାଜ୍ୟରେ ବିଜେପିର ବିଜୟ ପରେ ଆଜି ଭୁବନେଶ୍ୱରସ୍ଥ ବିଜେପି କାର୍ଯ୍ୟାଳୟ ହୋଇଥିଲା ଉତ୍ସବ ମୁଖର | ଏହି ବିଜୟ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ଗୃହମନ୍ତ୍ରୀ ଅମିତ ଶାହା, ସାଧାରଣ ଜନତାଙ୍କୁ ରାଜ୍ୟ ସଭାପତି ଶ୍ରୀ ମନମୋହନ ସାମଲ କୃତଜ୍ଞତା ଓ ଧନ୍ୟବାଦ ଜଣାଇଛନ୍ତି ।
ଶ୍ରୀ ସାମଲ କହିଛନ୍ତି ଯେ , ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର “ସବକା ସାଥ୍, ସବକା ବିକାଶ, ସବକା ବିଶ୍ୱାସ ଓ ସବକା ପ୍ରୟାସ”ର ମନ୍ତ୍ର ଆଜି ସାରା ଭାରତରେ ପ୍ରତିଫଳିତ ହେଉଛି । ମହିଳା ସଶକ୍ତିକରଣ, ଯୁବାଙ୍କୁ କର୍ମସଂସ୍ଥାନ ଓ କୃଷକମାନଙ୍କ ପ୍ରତି ସୁବିଚାର କରିବା ଭଳି ସରକାର ହେଉଛି ମୋଦି ସରକାର । ଏଥିଲାଗି ଛତିଶଗଡ, ମଧ୍ୟପ୍ରଦେଶ, ରାଜସ୍ଥାନ ରାଜ୍ୟ ବିଧାନସଭା ନିର୍ବାଚନରେ ବିଜେପିକୁ ବିପୁଳ ସମର୍ଥନ ମିଳିଛି । ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶ ପ୍ରତି ତାଙ୍କର କର୍ତବ୍ୟ ନିଷ୍ଠାକୁ ସବୁ ସମୟରେ ଗୁରୁତ୍ୱ ଦେଇଥାନ୍ତି । ଯୁବଶକ୍ତିର ଆସ୍ଥା ମୋଦି ସରକାରଙ୍କ ଉପରେ ରହିଛି । ମୋଦିଜୀ ଭାରତକୁ ବିକାଶ ପଥରେ ଆଗେଇ ନେବେ ବୋଲି ଯୁବଶକ୍ତି ବୁଝି ବିଚାରି ସମର୍ଥନ ଜଣାଇଛନ୍ତି । ଭାରତୀୟ ଜନତା ପାର୍ଟି ଗରିବଙ୍କ ପାଇଁ ସମର୍ପିତ ସରକାର । ଗରିବ ପାଇଁ ମୋଦିଜୀ ଯେଉଁ ଯୋଜନା କରନ୍ତି ତାହାକୁ ମଧ୍ୟ ତନ ତନ କରି ତଦାରଖ କରନ୍ତି । ଏବେ ମୋଦିଜୀ ହିଁ କେବଳ ଦେଶକୁ ବିକଶିତ ରାଷ୍ଟ୍ର କରିପାରିବେ ଏବଂ ପ୍ରତ୍ୟେକ ଗରିବଙ୍କୁ ଆର୍ôଥକ ସ୍ୱଚ୍ଛଳତା ଯୋଗାଇ ଦେଇପାରିବେ ବୋଲି ଦେଶବାସୀ ହୃଦୟଙ୍ଗମ କରିଛନ୍ତି । ଆଜି ମୋଦିଜୀଙ୍କ ନେତୃତ୍ୱ ପାଇଁ ୩ଟି ରାଜ୍ୟରେ ବିଜେପି “ବିଜୟ ମୁକଟ” ପିନ୍ଧିଛି । 
ଦୁର୍ନୀତିଗ୍ରସ୍ତ କଂଗ୍ରେସ ସରକାରର ମୂଳୋତ୍ପାଟନ କରି “ବିଜେପି” ଉପରେ ଜନତା ଆସ୍ଥା ରଖିଛନ୍ତି । ସନାତନ ବିରୋଧୀ ଓ ତୃଷ୍ଟିକରଣ ନୀତିକୁ ଦେଶବାସୀ ବରଦାସ୍ତ କରିବେ ନାହିଁ । ଦୁର୍ନୀତିଗ୍ରସ୍ତ କଂଗ୍ରେସ ଭାରତରେ ଅରାଜକତା ସୃଷ୍ଟି କରିବା କଂଗ୍ରେସର ପ୍ରକୃତି ଯାହାକୁ ହୃଦୟଙ୍ଗମ କରିଛନ୍ତି ଦେଶବାସୀ । ଏଥିଲାଗି “ବିଜେପି” ଉପରେ ଭରସା କରିଛନ୍ତି ଦେଶର ଜନତା ବୋଲି ଶ୍ରୀ ସାମଲ କହିଛନ୍ତି ।
୩ଟି ରାଜ୍ୟରେ ବିଜେପି ବିପୁଳ “ବିଜୟ ଲାଭ” କରିଥିବାରୁ ରାଜ୍ୟ କାର୍ଯ୍ୟାଳୟରେ ଆଜି ଉତ୍ସବ ପାଳନ କରାଯାଉଛି । ବାଜା, ରୋସଣୀ, ବାଣର ତାଳେ ତାଳେ ନାଚ ଓ ଗୀତ ସହ ଆନନ୍ଦ ଉଲ୍ଲାସରେ ରାଜ୍ୟ କାର୍ଯ୍ୟାଳୟରେ ସମସ୍ତ କାର୍ଯ୍ୟକତା ଉଲ୍ଲସିତ ।
ଏହି ଉତ୍ସବରେ ପୂର୍ବତନ ରାଜ୍ୟ ସଭାପତି ସମୀର ମହାନ୍ତି, ରାଜ୍ୟ ଉପସଭାପତି ପୃଥ୍ୱିରାଜ ହରିଚନ୍ଦନ, ଡ.ଲେଖାଶ୍ରୀ ସାମନ୍ତସିଂହାର, ରାଜ୍ୟ ସମ୍ପାଦକ ସରୋଜ କର, ରାଜ୍ୟ ସମ୍ପାଦିକା କସ୍ତୁରୀ ମିଶ୍ର, ରାଜ୍ୟ ମୁଖପାତ୍ର ରମାରଞ୍ଜନ ବଳିୟାରସିଂହ, ରାଜେନ୍ଦ୍ର ପଣ୍ଡା, ଠାକୁର ରଞ୍ଜିତ ଦାସ, ମନୋଜ ମହାପାତ୍ର, ରାଜ୍ୟ ସାମାଜିକ ଗଣମାଧ୍ୟମ ମୁଖ୍ୟ ଉମାକାନ୍ତ ପଟ୍ଟନାୟକ, ମହିଳାମୋର୍ଚ୍ଚା ରାଜ୍ୟ ସଭାନେତ୍ରୀ ଡା.ଐଶ୍ୱର୍ଯ୍ୟା ବିଶ୍ୱାଳ, ଜିଲ୍ଲା ସଭାପତି ବାବୁ ସିଂ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଜଗନ୍ନାଥ ପ୍ରଧାନ, ମହେଶ ମହାନ୍ତି, ଉନ୍ନତୀ ପରିଡା ପ୍ରମୁଖ ଉପସ୍ଥିତ ଥିଲେ ।
