ଭୁବନେଶ୍ୱର: ବର୍ତମାନ ଚଳଚ୍ଚିତ୍ର ଜଗତରେ ଚହଳ ପକାଇଥିବା ଓଡ଼ିଆ ଚଳଚ୍ଚିତ୍ର “ଦମନ୍‌”ର ସହଅଭିନେତା ତଥା ଶିକ୍ଷା ଓ ଅନୁସନ୍ଧାନ (ସୋଆ)ର ପୂର୍ବତନ ଛାତ୍ର ଦୀପନ୍ୱିତ ଦାଶମହାପାତ୍ରଙ୍କୁ ସାମାଜିକ ବାର୍ତା ପ୍ରଦାନ କରୁଥିବା ଏହି ଚଳଚ୍ଚିତ୍ରରେ ତାଙ୍କର ନିଖୁଣ ଅଭିନୟ ପାଇଁ ବିଶ୍ୱବିଦ୍ୟାଳୟ ପକ୍ଷରୁ ମଙ୍ଗଳବାର ସମ୍ବର୍ଦ୍ଧିତ କରିଯାଇଛି ।
ଓଡ଼ିଶାର ଦୁର୍ଗମ ଅଂଚଳରେ ମ୍ୟାଲେରିଆ ନିରାକରଣ ସହିତ ଅନ୍ଧବିଶ୍ୱାସକୁ ଦୂର କରିବା ଦିଗରେ ଜଣେ ଡାକ୍ତର ଏବଂ ତାଙ୍କର ସହଯୋଗୀ ଫାର୍ମାସିଷ୍ଟଙ୍କ ଆପ୍ରାଣ ଉଦ୍ୟମ ଓ ନିରବଚ୍ଛିନ୍ନ୍ ସଂଘର୍ଷର କାହାଣୀକୁ ନେଇ ଏହି ଚଳଚ୍ଚିତ୍ରଟି ନିର୍ମାଣ କରାଯାଇଛି । ଅଭିନେତା ବାବୁସାନ୍ ମହାନ୍ତି ଡାକ୍ତର ଭୂମିକାରେ ଅଭିନୟ କରିଥିବା ଏହି ଚଳଚ୍ଚିତ୍ରକୁ ରାଜ୍ୟ ସରକାର ଟିକସମୁକ୍ତ କରିଛନ୍ତି ।
ଏହି ଚଳଚ୍ଚିତ୍ରରେ ଫାର୍ମାସିଷ୍ଟ ଭୂମିକାରେ ଅଭିନୟ କରିଥିବା ଦୀପନ୍ୱିତ ସୋଆ ପରିଚାଳିତ ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର୍‌)ର ଇଲେକ୍ଟ୍ରିକାଲ୍ ଇଞ୍ଜିନିୟରିଂ ବିଭାଗର ପୂର୍ବତନ ଛାତ୍ର ଓ୨୦୧୭ ମସିହାରେ ସେ ପାସ କରିଛନ୍ତି । କଲେଜ ଦିନରୁ ହିଁ ସେ ଅଭିନୟ କ୍ଷେତ୍ରରେ ରୁଚି ରଖିଥିଲେ ଏବଂ ଆଇଟିଇଆର୍‌ର ଡ୍ରାମାଟିକ୍ କ୍ଲବ୍ ଟନେଲ୍‌ଷ୍ଟକ ଏବଂ ଉତର ପୁରୁଷ ଥିଏଟର ଗ୍ରୁପ୍ ସମେତ ବିଭିନ୍ନ ପ୍ରତିଷ୍ଠିତ ଥିଏଟର ଗ୍ରୁପ୍ ସହିତ ସେ ସମ୍ପୃକ୍ତ । ସେ ଭୁବନେଶ୍ୱରସ୍ଥିତ ଜୀବନରେଖା ଥିଏଟର ଗ୍ରୁପ୍‌ର ମଧ୍ୟ ଜଣେ ପ୍ରମୁଖ ସଦସ୍ୟ ଅଟନ୍ତି ।
ଦମନ୍ ଚଳଚ୍ଚିତ୍ରରେ ବାବୁସାନ୍‌ଙ୍କ ସହ ଫାର୍ମାସିଷ୍ଟ ଭାବେ ତାଙ୍କର ଭୂମିକାକୁ ନେଇ ଦୀପନ୍ୱିତ ପ୍ରଶଂସିତ ହୋଇଛନ୍ତି । ତାଙ୍କର ଚଳଚ୍ଚିତ୍ର “ପ୍ରତୀକ୍ଷା” ଆଇଏଫ୍‌ଏଫ୍‌ଆଇ – ୨୦୨୨ ର ଇଣ୍ଡିଆନ୍ ପାନୋରାମା ସେକ୍ସନ୍‌ରେ ସ୍କ୍ରିନିଂ ନିମନ୍ତେ ମନୋନୀତ ହୋଇଥିବା ବେଳେ ୱାଶିଂଟନ ଡିସି ସ୍ଥିତ ସାଉଥ ଏସିଆ ଫିଲ୍ମ ଫେଷ୍ଟିଭାଲ୍ -୨୦୨୨ ରେ ବେଷ୍ଟ ଷ୍ଟୋରୀ ଫିଚର୍ ଫିଲ୍ମ ଆୱାର୍ଡ ପାଇଛି ।
ଏହି ଅବସରରେ ଦୀପନ୍ୱିତ ନିଜର ଶିକ୍ଷାନୁଷ୍ଠାନ ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରାଯାଇଥିବାରୁ ଏହା ତାଙ୍କ ନିମନ୍ତେ ଏକ ବିଶେଷ ମୂହୁର୍ତ ବୋଲି କହିଥିଲେ ଏବଂ ତାଙ୍କର ସମସ୍ତ ଶିକ୍ଷକ ଶିକ୍ଷୟତ୍ରୀ ତାଙ୍କୁ ଉତ୍ସାହିତ କରିଥିବାରୁ କୃତଜ୍ଞତା ଜଣାଇଥିଲେ ।
“ଆଇଟିଇଆର୍‌ରେ ନାମ ଲେଖାଇବା ପୂର୍ବରୁ ମୋତେ ଅଭିନୟ ବିଷୟରେ କିଛି ଜଣା ନଥିଲା । ଟନିଲଷ୍ଟକରେ ଯୋଗ ଦେବା ପରେ ଅଭିନୟ ଶିଖି ପାରିଲି” ବୋଲି ସେ କହିଥିଲେ ।
ଦମନ ଚଳଚ୍ଚିତ୍ରରେ ତାଙ୍କର ନିଖୁଣ ଅଭିନୟ ନିମନ୍ତେ କୁଳପତି ପ୍ରଫେସର (ଡାକ୍ତର) ଅଶୋକ କୁମାର ମହାପାତ୍ର ଦୀପନ୍ୱିତଙ୍କୁ ପ୍ରଶଂସା କରିବା ସହ ଏହି କ୍ଷେତ୍ରରେ ତାଙ୍କର ଉତୋରତର ଉନ୍ନତି କାମନା କରିଥିଲେ ।
ଏହି ଅବସରରେ ସୋଆର ଉପକୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ, ଆଇଟିଇଆର୍‌ର ଡିନ୍ ପ୍ରଫେସର ପ୍ରଦୀପ କୁମାର ସାହୁ, ଆସୋସିଏଟ୍ ଡିନ୍ ପ୍ରଫେସର ଧିରେନ୍ଦ୍ରନାଥ ଥାଟୋଇ, ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ, ୟୁନିଭର୍ସିଟି ଆଉଟରିଚ୍ ପ୍ରୋଗ୍ରାମ ନିର୍ଦ୍ଦେଶକ ପ୍ରଫେସର ନଚିକେତା କେ. ଶର୍ମା, ଆଇଟିଇଆର୍ ୱାର୍ଡେନ୍ ପ୍ରଫେସର ରଞ୍ଜନ କୁମାର ମଲ୍ଲିକ୍ ଏବଂ ଆସୋସିଏଟ୍ ପ୍ରଫେସର ଡଃ ସତୀଶ ସାମଲ୍ ଉପସ୍ଥିତ ଥିଲେ ।