ଛାତ୍ରଛାତ୍ରୀମାନଙ୍କ ମଧ୍ୟରେ ବୈଜ୍ଞାନିକ ମନୋଭାବ ବୃଦ୍ଧି ପାଇଁ ଶିକ୍ଷକଶିକ୍ଷୟିତ୍ରୀମାନଙ୍କର ଭୂମିକା ଗୁରୁତ୍ୱପୂର୍ଣ୍ଣ
ଭୁବନେଶ୍ୱର (ଶାସକ ପ୍ରଶାସକ) :ବିଜ୍ଞାନ ହେଉଛି ବ୍ରହ୍ମ । ବିଜ୍ଞାନ ଯୋଗୁଁମନୁଷ୍ୟର ଜୀବନଯାପନ ସହଜ ହୋଇଛି ।ଛାତ୍ରଛାତ୍ରୀମାନେ ବିଜ୍ଞାନ ଶିକ୍ଷା କରି ବୈଜ୍ଞାନିକ ମନୋବୃତ୍ତି ବୃଦ୍ଧି କରିବା ଆବଶ୍ୟକ । ସେମାନଙ୍କ ମଧ୍ୟରେ ବୈଜ୍ଞାନିକ ମନୋଭାବ ବୃଦ୍ଧି ପାଇଁ ଶିକ୍ଷକ ଶିକ୍ଷୟିତ୍ରୀମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ଗତକାଲିଭୁବନେଶ୍ୱର ୟୁନିଟ୍-୮ ବାଳକ ଉଚ୍ଚ ବିଦ୍ୟାଳୟଠାରେ ଆୟୋଜିତ ଭୁବନେଶ୍ୱର ମହାନଗର ନିଗମ ସ୍ତରୀୟ ବିଜ୍ଞାନ, ଗଣିତ ଓ ପରିବେଶ ପ୍ରଦର୍ଶନୀରେ ଯୋଗଦେଇ ବକ୍ତାମାନେ ପ୍ରକାଶ କରିଛନ୍ତି ।
ପୂର୍ବାହ୍ନରେ ଅନୁଷ୍ଠିତ ବିଜ୍ଞାନ ମେଳାର ଉଦଘାଟନୀ ଉତ୍ସବରେ ଭୁବନେଶ୍ୱର ମହାନଗର ନିଗମ କମିଶନର ଶ୍ରୀ ବିଜୟ ଅମୃତା କୁଲାଙ୍ଗେ ମୁଖ୍ୟ ଅତିଥି ଭାବେ ଯୋଗଦେଇବିଜ୍ଞାନର ଆବଶ୍ୟକତା ରହିଥିବା ଏବଂ ଜ୍ଞାନର ଆହରଣ ଓ ସଫଳତା ପଛରେ ପରିଶ୍ରମ ରହିଥାଏ ବୋଲି ପ୍ରକାଶ କରିଥିଲେ । ମୁଖ୍ୟବକ୍ତା ଭାବେ ଓଡିଶା ବିଜ୍ଞାନ ଏକାଡେମୀ, ଭୁବନେଶ୍ୱରର ସଭାପତି ପ୍ରଫେସର ବିଭୂତି ଭୂଷଣ କର ଯୋଗଦେଇ ଶିକ୍ଷକ ଶିକ୍ଷୟିତ୍ରୀମାନେ ବିଜ୍ଞାନ ପଢାଇବା ସମୟରେ ବିଜ୍ଞାନ ସମ୍ବନ୍ଧୀୟ ପ୍ରତ୍ୟେକ ବିଷୟ ବସ୍ତୁକୁ ଛାତ୍ରଛାତ୍ରୀମାନଙ୍କୁ ଭଲ ଭାବେ ବୁଝାଇବାକୁ ପରାମର୍ଶ ଦେଇଥିଲେ । ସମ୍ମାନିତ ଅତିଥି ଭାବେ ବିଜ୍ଞାନ ଏକାଡେମୀର ସମ୍ପାଦକ ପ୍ରଫେସର ଆଶିଷ କୁମାର ମହାନ୍ତି ଯୋଗଦେଇ ଛାତ୍ରଛାତ୍ରୀଙ୍କ ଭାବନାକୁ ଆହୁରି ଜାଗ୍ରତ କରିବା ପାଇଁ ଉଦ୍ଦିଷ୍ଟ ଏହି ଏହି ବିଜ୍ଞାନ ମେଳା, ସେମାନଙ୍କର ଅଭିନବ ବୈଜ୍ଞାନିକ ମନୋଭାବକୁ ବିକଶିତ କରିବାରେ ଅଧିକ ସହାୟକ ହେବ ବୋଲି କହିଥିଲେ ।ଅନ୍ୟତମ ସମ୍ମାନିତ ଅତିଥି ଭାବେ ଭୁବନେଶ୍ୱରସ୍ଥିତ ପ୍ରାକୃତିକ ଇତିହାସ କ୍ଷେତ୍ରୀୟ ସଂଗ୍ରହାଳୟର ବୈଜ୍ଞାନିକ ଡଃ. ପ୍ରିୟଦର୍ଶିନୀ ନାୟକ ଯୋଗଦେଇ ବିଭିନ୍ନ ଉଦାହରଣ ମାଧ୍ୟମରେ କହିଲେ ଯେ, ବିଜ୍ଞାନର ବହୁଳ ବ୍ୟବହାର ପ୍ରକୃତି ଉପରେ କୁପ୍ରଭାବ ପଡୁଥିବାରୁ ଛାତ୍ରଛାତ୍ରୀମାନେ ଜଳବାୟୁ ପ୍ରଦୂଷଣ ଓ ଜଳବାୟୁ ପରିବର୍ତ୍ତନ ସଂକଟକୁ ସମ୍ମୁଖୀନ ହେବାକୁ ସକ୍ଷମ ହେବା ପାଇଁ ଏବେଠାରୁ ସେମାନଙ୍କୁ ଶିଖିବାର ଆବଶ୍ୟକତା ରହିଛି । ପରେ ପରେ ଅତିଥିମାନଙ୍କ ଦ୍ୱାରା ପ୍ରଦର୍ଶନୀ ଉଦଘାଟିତ ହୋଇଥିଲା l ଅତିଥିମାନେ ବିଭିନ୍ନ ପ୍ରକଳ୍ପ ବୁଲି ଦେଖିଥିଲେ l ପ୍ରଦର୍ଶନୀରେ ଭୁବନେଶ୍ୱର ମହାନଗର ନିଗମ ଅନ୍ତର୍ଗତ ବିଭିନ୍ନ ସ୍କୁଲରୁ ଛାତ୍ରଛାତ୍ରୀମାନଙ୍କ ଦ୍ୱାରା ୪୯୮ ଟି ପ୍ରକଳ୍ପ ଉପସ୍ଥାପିତ ହୋଇଥିଲା l
ଅପରାହ୍ଣରେ ବିଜ୍ଞାନମେଳାର ଉଦଯାପନୀ ଉତ୍ସବରେ ଭୁବନେଶ୍ୱର (ମଧ୍ୟ) ବିଧାୟକ ଶ୍ରୀ ଅନନ୍ତ ନାରାୟଣ ଜେନା ମୁଖ୍ୟ ଅତିଥି ଭାବେ ଯୋଗଦେଇ ଉଚ୍ଚକୋଟୀର ପ୍ରକଳ୍ପ ଉପସ୍ଥାପିତ କରିଥିବା ଛାତ୍ରଛାତ୍ରୀଙ୍କୁ ପୁରସ୍କୃତ କରିବା ସହିତ ଅଂଶଗ୍ରହଣ କରିଥିବା ଅନ୍ୟ ସମସ୍ତ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ । ଛାତ୍ରଛାତ୍ରୀମାନଙ୍କ ମଧ୍ୟରେ ବୈଜ୍ଞାନିକ ମନୋଭାବ ବୃଦ୍ଧି ପାଇଁ ଶିକ୍ଷକଶିକ୍ଷୟିତ୍ରୀମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିବା ଶ୍ରୀ ଜେନା ପ୍ରକାଶ କରିଥିଲେ । ମୁଖ୍ୟ ବକ୍ତା ଭାବେ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ, ଭୁବନେଶ୍ୱର ଶ୍ରୀ ପଠାଣି ରାଉତ ଯୋଗ ଦେଇ ପିଲାଦିନରୁ ବୈଜ୍ଞାନିକ ମନୋବୃତ୍ତି ରଖି ଅଧ୍ୟୟନକଲେ ଏବଂ ଅଧ୍ୟବସାୟ ବଳରେ ଭବିଷ୍ୟତରେ କିପରି ବିଜ୍ଞାନ ନିଜ ଜୀବିକା ନିର୍ବାହରେ ସହାୟକ ହୋଇଥାଏ, ସେ ସମ୍ପର୍କରେ ଉଦାହରଣ ଦେଇଥିଲେ l ସମ୍ମାନିତ ଅତିଥି ଭାବେ ୟୁନିଟ-୯ ବାଳକ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକଶ୍ରୀ ବିଜୟ କୁମାର ବେହେରା ଯୋଗଦେଇ ଛାତ୍ରଛାତ୍ରୀମାନଙ୍କର ବୈଜ୍ଞାନିକ ମନୋଭାବ ବୃଦ୍ଧି ସମ୍ପର୍କରେ ବକ୍ତବ୍ୟ ରଖିଥିଲେ । ସ୍ଥାନୀୟ କର୍ପୋରେଟର ଶ୍ରୀମତୀ ସୁଚିତ୍ରା ପାତ୍ର ଅତିଥି ଭାବେ ଯୋଗଦେଇଥିଲେ । ବରିଷ୍ଠ ଗୋଷ୍ଠୀ ଶିକ୍ଷା ଅଧିକାରୀ ଶ୍ରୀମତୀ ପ୍ରଜ୍ଞା ପାରମିତା ଜେନାଙ୍କ ଅଧ୍ୟକ୍ଷତାରେ ଉଦଘାଟନୀ ଓ ଉଦଯାପନୀ ସଭା ଅନୁଷ୍ଠିତ ହୋଇଥିଲା ।ସରକାରୀ ଗୋଷ୍ଠୀ ଶିକ୍ଷା ଅଧିକାରୀ ତଥା- ୟୁ.ଆର୍.ସି.ସି(ବିଏମସି) ଶ୍ରୀମତୀ ତୃପ୍ତିମୟୀ ଭଞ୍ଜ, ୟନିଟ୍-୮ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ଶ୍ରୀ ଅଭିରାମ ଗୌଡ ଓ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ ଏହି ପ୍ରଦର୍ଶନୀ ସଫଳତାର ସହ ଆୟୋଜନ ନେଇ ସହାୟତା କରିଥିଲେ । ବିଭିନ୍ନ ବିଭାଗରେ ବିଜ୍ଞାନ, ଗଣିତ ଓ ପରିବେଶ ବିଜ୍ଞାନ କ୍ଷେତ୍ରରେ ଅଭିନବ ପ୍ରକଳ୍ପ ଉପସ୍ଥାପନ ପାଇଁ ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଥିଲା ।
