ଭୁବନେଶ୍ୱର (ଶାସକ ପ୍ରଶାସକ) : ଲିଙ୍ଗରାଜ ମନ୍ଦିର, ଅନ୍ୟାନ୍ୟ ମନ୍ଦିର ଏବଂ ମଠ ଗୁଡିକର ଉତ୍ତମ ପରିଚାଳନା ଏବଂ ଦୈନନ୍ଦିନ କାର୍ଯ୍ୟ ସୁପରିଚାଳନା ଉଦ୍ଦେଶ୍ୟରେ ଗୋଟିଏ କମିଟି ଗଠନ ପାଇଁ "ଶ୍ରୀ ଲିଙ୍ଗରାଜ ମନ୍ଦିର ବିଧେୟକ,୨୦୨୦" ଅଧ୍ୟାଦେଶକୁ ଆଜି ରାଜ୍ୟ କ୍ୟାବିନେଟ୍ ମଞ୍ଜୁରୀ ପ୍ରଦାନ କରିଛନ୍ତି | ବର୍ତ୍ତମାନ ଲିଙ୍ଗରାଜ ମନ୍ଦିର ଦେବୋତ୍ତର ଆଇନ1951 ଦ୍ୱାରା ପରିଚାଳିତ | ସୂଚନାଯୋଗ୍ୟ ଯେ କିଛିଦିନ ତଳେ ଏକାମ୍ର କ୍ଷେତ୍ର ବିକାଶ କାର୍ଯ୍ୟ ଅନୁଧ୍ୟାନ କରିବାକୁ ଆସିଥିବା ବେଳେ ସେବାୟତମାନେ ଏକ ଆଇନ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅନୁରୋଧ କରିଥିଲେ | ମୁଖ୍ୟମନ୍ତ୍ରୀ ସେମାନଙ୍କୁ ପ୍ରତିଶ୍ରୁତି ଦେଇଥିଲେ ଯେ " ମୁ ନିଶ୍ଚୟ ଆଇନ କରିବି" | ଆଉ ସେବାୟତଙ୍କୁ ଦେଇଥିବା ପ୍ରତିଶୃତି ଅନୁଯାୟୀ ଆଜି ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏ ସମ୍ପର୍କିତ ଅଧ୍ୟାଦେଶକୁ ମଞ୍ଜୁରୀ ମିଳିଛି |
ସୂଚନା ଅନୁଯାୟୀ ଏହି ଅଧିନିୟମ ଅନ୍ତର୍ଗତ ଶ୍ରୀ ଲିଙ୍ଗରାଜ ମନ୍ଦିରର ସୁପରିଚାଳନା ପାଇଁ ସ୍ଵତନ୍ତ୍ର ଆଇନ ସହ ୧୫ ଜଣିଆ ପରିଚାଳନା କମିଟି ଗଠନ ନେଇ ବିଧେୟକରେ ବ୍ୟବସ୍ଥା ରହିଛି | ସେବା-ପୂଜା ଏବଂ ନୀତି ସମେତ ମନ୍ଦିରର କାର୍ଯ୍ୟ ପରିଚାଳନା ପାଇଁ କ୍ଷମତା ଏହି କମିଟି ହାତରେ ନ୍ୟସ୍ତ ରହିବ | କମିଟି ମନ୍ଦିର ଭିତରେ ଓ ବାହାରେ ମନ୍ଦିର ସମ୍ପତ୍ତିର ପରିଚାଳନା କରିବ।
ରୀତିନୀତି, ମନ୍ଦିର ପରିଚାଳନା ଏବଂ ପରିଚାଳନା ତଥା ଏହାର ସମ୍ପତ୍ତିର ସଠିକ୍ କାର୍ଯ୍ୟକାରିତା ପାଇଁ ପୃଥକ ନିୟମ ସହାୟକ ହେବ | ରାଜ୍ୟ ସରକାରଙ୍କ ଜଣେ ଅଧିକାରୀଙ୍କ କହିବା ଅନୁଯାୟୀ ଏହାଦ୍ୱାରା ମନ୍ଦିରର କାର୍ଯ୍ୟଗୁଡ଼ିକର ଉତ୍ତମ ଏବଂ ସଠିକ୍ ପରିଚାଳନା ହେବ | ଭକ୍ତ ଏବଂ ତୀର୍ଥଯାତ୍ରୀମାନଙ୍କ ପାଇଁ ଉତ୍ତମ ସୁବିଧା ସୁନିଶ୍ଚିତ ହେବ |
ଲିଙ୍ଗରାଜ ମନ୍ଦିରର ସମ୍ପତ୍ତି ସୁରକ୍ଷିତ ରଖିବା ସହ ସମସ୍ତ ଆନୁସଙ୍ଗିକ ଦିଗ- ପରିଚାଳନା କମିଟିର ସମ୍ବିଧାନ, ଏହାର ସଂରଚନା, ଦାୟିତ୍ୱ ଏବଂ କ୍ଷମତା , ପ୍ରଶାସକଙ୍କ ଦାୟିତ୍ୱ ଏବଂ କ୍ଷମତା , ମନ୍ଦିରର ସ୍ଥାବର ତଥା ଅସ୍ଥାବର ସମ୍ପତ୍ତିର ରକ୍ଷଣାବେକ୍ଷଣ ତଥା ପରିଚାଳନା ବିଷୟରେ ବିସ୍ତୃତ ବ୍ୟବସ୍ଥା କରାଯାଇଛି। । ସେବାୟତମାନଙ୍କର ଭୂମିକା ଏବଂ ଦାୟିତ୍ୱ, ମନ୍ଦିର ପାଣ୍ଠିର ଗଠନ ଏବଂ ଏହାର ପରିଚାଳନା ମଧ୍ୟ ଏହି ନିୟମ ସ୍ପଷ୍ଟ ଭାବରେ ବ୍ୟାଖ୍ୟା କରିବ।
