ଯୋଗ୍ୟତା ଥାଇ ବି ହିତାଧିକାରୀ ପାଉଛନ୍ତି କେଉଁ ଭୁଲର ସଜା !
ସରପଞ୍ଚ ଓ ବିଡିଓଙ୍କୁ ଜଣାଇଲା ପରେ ବି ସ୍ଵାଧୀନକୁ ମିଳିଲାନି ଘର
ରେଢାଖୋଲ ଉପଖଣ୍ଡ ପ୍ରତିନିଧି ଯଶୋବନ୍ତ ନାରାୟଣ ସାହୁ : ସରକାର ଗରୀବ ଶ୍ରେଣୀର ଲୋକମାନଙ୍କର ଉନ୍ନତି ପାଇଁ ନାନା ପ୍ରକାର ଯୋଜନା କାର୍ଯ୍ୟକାରୀ କରିଛନ୍ତି । ଯାହାର ରହିବା ପାଇଁ ବାସଗୃହ ନାହିଁ ସେମାନଙ୍କ ପାଇଁ ସରକାର ପ୍ରଧାନମନ୍ତ୍ରୀ ଆବାସ ଯୋଜନା , ବିଜୁ ପକ୍କାଘର ଯୋଜନାରେ ଘର ଯୋଗାଇ ଦେଉଛନ୍ତି । ଏଥିପାଇଁ ସରକାର ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ପ୍ରକୃତ ହିତାଧିକାରୀ ଏହି ଯୋଜନାର ଫାଇଦା ପାଇ ପାରୁନାହାନ୍ତି । କିଛି କୁଜୀନେତାଙ୍କ ପ୍ରଲୋଭନରେ ସରକାରୀବାବୁମାନେ ଧନୀ ଲୋକମାନଙ୍କ ଠାରୁ ମୋଟା ଅଙ୍କର ଫାଇଦା ପାଇ ଆବାସ ଘର ଦେଉଥିବା ଆମ ନଜିର ରହିଛି । ସଠିକ୍ ସର୍ଭେ ହେଉ ନ ଥିବାରୁ ଯୋଗ୍ୟ ହିତାଧିକାରୀ ଏଇ ସବୁ ଯୋଜନାର ସୁଫଳ ପାଇ ପାରୁନାହାନ୍ତି । ଏପରିକି ଗୋଟିଏ ଘରୁ ଦୁଇ ଦୁଇଟି ଘର ହାତେଇବାର ମଧ୍ୟ ନଜିର ରହିଛି । ଯାହାକି ଅନୁସନ୍ଧାନ କଲେ ସମସ୍ତ ତଥ୍ୟ ମିଳିପାରିବ ।
ସରକାରଙ୍କ ଏଇ ଆବାସ ଯୋଜନାରେ ଫାଇଦା ନ ପାଇ ଝାଟି ମାଟିର ନଡା ଛପର ଘର ତଳେ ଦୀର୍ଘ ବର୍ଷ ହେଲା ଜୀବନ ବିତାଉଛନ୍ତି ରେଢାଖୋଲ ବ୍ଲକ କୁକୁଡାବାହାଳି ପଞ୍ଚାୟତ, ବଡ କଷିବାହାଲ ଗ୍ରାମର ସ୍ଵାଧୀନ ପ୍ରଧାନ ଓ ତାଙ୍କ ଧର୍ମ ପତ୍ନୀ ରୀତା ପ୍ରଧାନ | ତାଙ୍କ ଗୋଟିଏ ପୁଅ , ଗୋଟିଏ ଝିଅ । ତାଙ୍କୁ କେବଳ ଜବ କାର୍ଡ ଏବଂ ରାସନ୍ କାର୍ଡ ମିଳିଛି । ଅସହାୟ ଅବସ୍ଥାରେ ସ୍ଵାଧୀନଙ୍କ ପରିବାର ଜୀବନ ବିତୁଛି । ମୂଲ ମଜୁରୀ କରି ପେଟ ପୋଷନ୍ତି ସେ ତାଙ୍କ ଘର ମରାମତି ପାଇଁ ଆବଶ୍ୟକ ସମ୍ବଳ ଅଭାବରୁ ବର୍ଷା ଦିନରେ ଘର ଭିତରେ ପାଣି ପଶିଯାଉଛି । ସରକାରୀ ସହାୟତା ପାଇଁ ଦାରିଦ୍ର୍ୟ ସୀମାରେଖାର ମାନଦଣ୍ଡ ସ୍ଵାଧୀନ ପରିବାରଙ୍କ ପାଇଁ ଅବୁଝା ହୋଇରହିଛି । ସ୍ଥାନୀୟ ସରପଞ୍ଚ , ରେଢାଖୋଲ ବିଡିଓ ଙ୍କୁ ଏ ସଂପର୍କରେ ବହୁତ ଥର ସ୍ଵାଧୀନ ଲିଖିତ ଭାବରେ ଜଣାଇଥିଲେ ମଧ୍ୟ ହଁ ହଁ ରେ ହଜିଯାଇଛି ସ୍ଵାଧୀନ ଙ୍କ ପରିବାର ର ଭାଗ୍ୟ ।ତେବେ ଏହି ପରିବାର ସମସ୍ୟା ନେଇ ସେ ନିଜେ ବିଡିଓଙ୍କୁ ବାରୁମ୍ବାର ଜଣାଇ ଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନାହିଁ ଓ ସରକାରୀ ସହାୟତା ତାଙ୍କ ପାଇଁ ଅପହଞ୍ଚ ହୋଇ ରହିଛି । ଭଙ୍ଗାଘର ଓ ଝାଟି ମାଟିର ନାଡା ଛପର ଘର ତଳେ ଜୀବନ ବିତାଉଥିବା ଏକ ବେସାହାରା ପରିବାର ପାଇଁ ସରକାରୀ ସହାୟତା ଉପହାସ ସଦୃଶ ହୋଇଛି । ପୀଡିତ ପରିବାରକୁ ବିଭାଗୀୟ ଉଚ୍ଚ କତୃପକ୍ଷ ଘଟଣାର ତଦନ୍ତ ପାଇଁ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହେଉଛି ।