ସରିଲା ଏକ ମାସର ପ୍ରଶିକ୍ଷଣ କାର୍ଯ୍ୟକ୍ରମ "ଉଡ଼ାଣ"-ଦ୍ବିତୀୟ ସଂସ୍କରଣ
-ପାରଳାଖେମୁଣ୍ଡି/ ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲାର ବେକାର ଯୁବକ ଓ ଯୁବତୀ ମାନଙ୍କ ନିମନ୍ତେ ଗତ ଏକ ମାସ ଧରି ଜିଲ୍ଲା ପୋଲିସ ପକ୍ଷରୁ ଖାସ କରି ଏସପି ସାରା ଶର୍ମାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଜିଲ୍ଲାରେ ଆରମ୍ଭ ଯୋଇଥିବା ଅଭିନବ କାର୍ଯ୍ୟକ୍ରମ "ଉଡାନ"ର ଦ୍ଵିତୀୟ ସଂସ୍କରଣ ଉଦ୍ଯାପିତ୍ ହୋଇଯାଇଛି ।
ପାରଳାଖେମୁଣ୍ଡି ଉପକଣ୍ଠରେ ଥିବା ବେତାଗୁଡା଼ ସ୍ଥିତ ରିଜର୍ଭ ପୋଲିସ କାର୍ଯ୍ୟାଳୟ ପଡିଆ ଠାରେ ଏହି ପ୍ରଶିକ୍ଷଣ କାର୍ଯ୍ୟକ୍ରମ ଏକମାସ ଧରି ଚାଲିଥିଲା । ତାଲିମ-ପ୍ରାପ୍ତ ବଛା ବଛା ପୋଲିସ ଅଧିକାରୀମାନେ ବେକାର ଯୁବକ ଓ ଯୁବତୀ ମାନଙ୍କୁ ମୁଖ୍ୟତଃ ସାମରିକ ଓ ଅର୍ଦ୍ଧ-ସାମରିକ ବାହିନୀ ସମେତ ପାରା ମିଲିଟାରୀ ଫୋର୍ସ ଏବଂ ପୋଲିସ ବାହିନୀ ପ୍ରଭୃତିରେ ନିଯୁକ୍ତି ଓ ସାକ୍ଷାତକାର ପରୀକ୍ଷାର ସମ୍ମୁଖିନ ହେବା ପୁର୍ବରୁ ନିଜକୁ କିଭଳି ପ୍ରସ୍ତୁତ ହେବେ ଏବଂ ତାର ସାମ୍ନା କରି ସଫଳ ହେବେ , ସେ ସମସ୍ତ ଉପରେ ପ୍ରାକ୍ଟିକାଲ ଓ ଥିଓରିଟିକାଲ ପ୍ରଶିକ୍ଷଣ ସବୁ ଦେଇଥିଲେ ।
ଏହି ପ୍ରଶିକ୍ଷଣ ପାଇଁ ଜିଲ୍ଲାର ବିଭିନ୍ନ ଅଞ୍ଚଳରୁ ମୋଟ ୩୦୦ ଜଣ ବେକାର ଯୁବକ ଯୁବତୀ ଆସି ସେମାନଙ୍କ ନାମ ପଞ୍ଜିକରଣ କରାଇ ପୋଲିସ ଅଧିକାରୀ ଓ ତାଲିମ ଅଧିକାରୀଙ୍କ ଠାରୁ ପ୍ରଶିକ୍ଷଣ ଗ୍ରହଣ କରିଥିଲେ। ଜିଲ୍ଲା ଆରକ୍ଷୀ ଅଧିକ୍ଷକ ସାରା ଶର୍ମାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଦ୍ଯାପନୀ କାର୍ଯ୍ୟକ୍ରମରେ ପାରଳାଖେମୁଣ୍ଡି ବିଧାୟକ କେ.ନାରାୟଣ ରାଓ ମୁଖ୍ୟ ଅତିଥି ରୂପେ ଯୋଗ ଦେଇ ଏପରି କାର୍ଯ୍ୟକ୍ରମକୁ ପ୍ରସଂଶା କରିବା ସହ ଜିଲ୍ଲାର ବେକାର ଯୁବକ ଯୁବତୀ ମାନେ ଉପକୃତ ହୋଇପାରିବେ ବୋଲି କହିଥିଲେ।
ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଗଜପତି ଜିଲ୍ଲାପାଳ ଅନୁପମ ସାହା ,ପାରଳା ଯୁବରାଣୀ କଲ୍ୟାଣୀ ଦେବୀ, ଜିଲ୍ଲା ମଙ୍ଗଳ ଅଧିକାରୀ ସନ୍ତୋଷ କୁମାର ରଥ, ଏସ୍.ଡି.ପି.ଓ ପ୍ରକାଶ ଚନ୍ଦ୍ର ଜେନା ପ୍ରମୁଖ ମଞ୍ଚସୀନ ଅତିଥି ଭାବେ ଯୋଗ ଦେଇ ଶିବିରାର୍ଥୀ ମାନେ ସମସ୍ତ ତାଲିମ ଗୁଡ଼ିକର ଅଭ୍ୟାସ ଜାରି ରଖିବା ସହ ଆବଶ୍ୟକ ସ୍ଥଳେ ସଦ-ବିନିଯୋଗ କରିବାକୁ ପରାମର୍ଶ ଦେଇଥିଲେ ଏବଂ ପ୍ରଶିକ୍ଷାର୍ଥି ମାନଙ୍କ ଭବିଷ୍ୟତ ସଫଳତା କାମନା କରିଥିଲେ ।
ପାରଳା ଆଦର୍ଶ ଥାନା ଅଧିକାରୀ ବିବେକା ନନ୍ଦ ସ୍ବାଇଁ ଉପସ୍ଥିତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଜିଲ୍ଲା ଆରକ୍ଷୀ ଅଧିକ୍ଷକ ସାରା ଶର୍ମାଙ୍କ ସମେତ ଅତିଥି ମାନେ ଶିବିରାର୍ଥୀମାନଙ୍କୁ ପ୍ରମାଣ ପତ୍ର ଓ ଶିକ୍ଷଣୀୟ ତଥା ଉପାଦେୟ ପୁସ୍ତକ ବଣ୍ଟନ କରିଥିଲେ ।
